पुणे : पुणे शहरातील सार्वजनिक ठिकाणे दिव्यांग व्यक्ती, ज्येष्ठ नागरिक आणि हालचालींमध्ये अडचण असलेल्या नागरिकांसाठी अधिक सोयीची आणि सुलभ करण्यासाठी पुणे महानगरपालिका (PMC) आणि RampMyCity यांच्यात सामंजस्य करार करण्यात आला आहे.
या उपक्रमाच्या पहिल्या टप्प्यात पुणे शहरातील 50 सार्वजनिक ठिकाणी व्हीलचेअर वापरणाऱ्या व्यक्तींसाठी रॅम्प बसविण्यात येणार आहेत. या कामासाठी Bajaj Finserv यांच्या CSR निधीतून सहकार्य मिळणार आहे.
या रॅम्पमुळे महापालिका कार्यालये, सांस्कृतिक स्थळे, उद्याने आणि इतर सार्वजनिक ठिकाणी व्हीलचेअर वापरणाऱ्या व्यक्तींना सहज प्रवेश करता येईल. तसेच ज्येष्ठ नागरिक आणि चालताना अडचण येणाऱ्या नागरिकांनाही याचा फायदा होईल.
हा उपक्रम “Building a Purple Pune” या संकल्पनेचा एक भाग आहे. पुणे शहरातील सर्व नागरिकांना सार्वजनिक ठिकाणे समान आणि सहज वापरता यावीत, हा या उपक्रमाचा मुख्य उद्देश आहे.
पहिल्या टप्प्यात 50 ठिकाणी रॅम्प बसविण्यात येणार आहेत. त्यानंतरच्या टप्प्यांमध्ये दिव्यांग व्यक्तींना येणाऱ्या इतर अडचणी दूर करण्यासाठी सार्वजनिक ठिकाणी आणखी विविध सुविधा उपलब्ध करून देण्याचे नियोजन आहे.
या उपक्रमामध्ये पुणे महानगरपालिकेच्या सार्वजनिक सुविधा, RampMyCity चे तांत्रिक ज्ञान आणि Bajaj Finserv चे CSR सहकार्य यांचा एकत्रित उपयोग केला जाणार आहे.
पुण्याच्या मा.महापौर सौ. मंजुषा नागपुरे म्हणाल्या :- “पुणे शहरातील प्रत्येक नागरिकाला सार्वजनिक ठिकाणी समान आणि सहज प्रवेश मिळावा, हे आमचे उद्दिष्ट आहे. दिव्यांग व्यक्तींना कोणत्याही अडथळ्याशिवाय आणि सन्मानाने शहरातील सुविधांचा वापर करता यावा, यासाठी हा उपक्रम महत्त्वाचा आहे.”
मा.महापालिका आयुक्त श्री. नवल किशोर राम म्हणाले : “सार्वजनिक पायाभूत सुविधांचा विकास करताना दिव्यांग व्यक्तींच्या गरजांचा विचार करणे आवश्यक आहे. या उपक्रमामुळे पुण्यातील अनेक सार्वजनिक ठिकाणे अधिक सुलभ होतील आणि शहर नागरिकांसाठी अधिक सोयीचे बनेल.”
मा.अतिरिक्त महापालिका आयुक्त सौ. पवनीत कौर म्हणाल्या : “दिव्यांग व्यक्तींसाठी सार्वजनिक ठिकाणे सुलभ करणे हा समावेशक पुणे घडविण्याचा महत्त्वाचा भाग आहे. या उपक्रमातून प्रत्यक्ष सुविधा निर्माण होत आहेत. भविष्यात अशा सुविधा शहरातील आणखी ठिकाणी उपलब्ध करून देण्याचा प्रयत्न केला जाईल.”
Bajaj Finserv CSR च्या National Lead डॉ. अमनप्रीत कौर म्हणाल्या : “दिव्यांग व्यक्तींसाठी योग्य सुविधा उपलब्ध झाल्यास त्यांना दैनंदिन जीवनात अधिक स्वावलंबीपणे वावरता येते. पुणे महानगरपालिका आणि RampMyCity यांच्या या उपक्रमाला सहकार्य करताना आम्हाला आनंद होत आहे.”
RampMyCity चे संस्थापक श्री. प्रतीक खंडेलवाल म्हणाले : “50 सार्वजनिक ठिकाणी रॅम्प बसवल्यामुळे दिव्यांग व्यक्तींना अधिक सहजपणे आणि सन्मानाने सार्वजनिक ठिकाणांचा वापर करता येईल. मात्र, ही सुरुवात आहे. भविष्यात पुणे शहरातील इतर अडथळेही दूर करून शहर सर्वांसाठी अधिक सुलभ करण्याचे आमचे उद्दिष्ट आहे.”
या उपक्रमामुळे पुणे शहरातील सार्वजनिक ठिकाणे दिव्यांग, ज्येष्ठ नागरिक आणि हालचालींमध्ये अडचण असलेल्या नागरिकांसाठी अधिक सुरक्षित, सोयीची आणि सुलभ होण्यास मदत होईल.
पहिल्या टप्प्यात 50 ठिकाणी रॅम्प बसविण्यात येणार असून, भविष्यात अशा सुविधांचा विस्तार शहरातील आणखी सार्वजनिक ठिकाणी करण्यात येणार आहे.
